7.3 舞娘颺一个白色 ê 物件

7.3 Bú-niû iāⁿ chi̍t-ê pe̍h-sek ê mi̍h-kiāⁿ [Tâi-gí gí-im]

"Pài-thok, pài-thok."

"Chin to-siā. Goán pún-chiâⁿ eng-kai kā i sàng-kàu Mito, m̄-koh chò bē-kàu ah." Khòng-kang in it-ti̍t kǎ soeh-siā.

Pok-á chûn iô kah chin lī-hāi. Bú-niû iáu-sī chhùi-tûn ha̍p ân-ân, it-ti̍t khòaⁿ piⁿ-á khì. Góa chhiú khiú soh-á thui oa̍t-thâu ê sî, i ká-ná boeh kóng chài-hōe, m̄-koh iáu-sī bô kóng chhut-chhùi, chí-sī koh chi̍t-kái tìm-thâu. Pok-á chûn tńg-khì bé-thâu ah. Eikichi tōa-la̍t ia̍t góa tú-chiah sàng i ê phah-chiáu bō-á. Khì-chûn lī hōaⁿ hn̄g-hn̄g ê sî, bú-niû chiah khai-sí iāⁿ chi̍t-ê peh-sek ê mi̍h-kiāⁿ.

Khì-chûn sái-chhut Shimoda káng-kháu, Izu póaⁿ-tó ê lâm-pêng chiām-chiām siau-sit khì. Góa it-ti̍t lóng khò tī lân-kan, hn̄g-hn̄g khòaⁿ hái-siōng ê Oshima tó. Góa kám-kak kap bú-niû ê lī-pia̍t ká-ná í-keng sī chin kú í-chêng ê tāi-chì ah. Góa gia̍h-ba̍k khòaⁿ chûn-chhng lāi-té, khòaⁿ a-pô taⁿ án-chóaⁿ, khòaⁿ tio̍h chē-chē lâng ûi tī i sin-piⁿ, ná-chhiūⁿ teh hō͘ i chióng-chióng ê an-ùi. Án-ne góa tō hòng-sim, tō kiâⁿ-ji̍p keh-piah chûn-chhng. Sagami Nada (相模灘) hái-siōng ê éng chin tōa, chē tio̍h ê sî, put-sî hō͘ iô kah tang-tó sai-oai. Chûn-oân sì-kè pun lia̍h-thò͘ iōng ê thih-phûn. Góa thâu thiap kha-báng tó--lo̍h-lâi. Thâu-náu khang-khang, bô kám-kak sî-kan ê keng-kòe. Ba̍k-sái chha̍p-chha̍p tih, lâu-lo̍h tī kha-báng. Chhùi-phoé mā kám-kak ē léng ah, góa tō kā kha-báng péng--kòe-lâi. Tó tī góa ê piⁿ-á sī chi̍t-ê siàu-liân. I sī Kawazu (河津) chi̍t-keng kang-chhiáng thâu-ke ê hāu-seⁿ, boeh khì Tokyo chún-pī ji̍p-ha̍k khó-chhì, só͘-í khòaⁿ góa tì ha̍k-seng bō-á tùi góa ū hó-kám. Goán kóng liáu kúi-kù-á ōe, i mn̄g góa kóng:

--

7.3 舞娘颺一个白色 ê 物件 [台語語音]

"拜託, 拜託."

"真多謝. 阮本成應該 kā 伊送到 Mito, 毋過做袂到 ah." 礦工 in 一直 kǎ 說謝.

駁仔船搖甲真厲害. 舞娘猶是喙脣合絚絚, 一直看邊仔去. 我手搝索仔梯越頭 ê 時, 伊 ká-ná 欲講再會, 毋過猶是無講出喙, 只是 koh 一改 tìm 頭. 駁仔船轉去碼頭 ah. Eikichi 大力擛我拄才送伊 ê 拍鳥帽仔. 汽船離岸遠遠 ê 時, 舞娘才開始颺一个白色 ê 物件.

汽船駛出 Shimoda 港口, Izu 半島 ê 南爿漸漸消失去. 我一直攏靠 tī 欄杆, 遠遠看海上 ê Oshima 島. 我感覺 kap 舞娘 ê 離別 ká-ná 已經是真久以前 ê 代誌 ah. 我攑目看船艙內底, 看阿婆今按怎, 看著濟濟人圍 tī 伊身邊, ná 像 teh 予伊種種 ê 安慰. Án-ne 我 tō 放心, tō 行入隔壁船艙. Sagami Nada (相模灘) 海上 ê 湧真大, 坐著 ê 時, 不時予搖甲東倒西歪. 船員四界分掠兔用 ê 鐵盆. 我頭 thiap kha-báng 倒落來. 頭腦空空, 無感覺時間 ê 經過. 目屎㴙㴙滴, 流落 tī kha-báng. 喙 phé mā 感覺會冷 ah, 我 tō kā kha-báng 反過來. 倒 tī 我 ê 邊仔是一个少年. 伊是 Kawazu (河津) 一間工廠頭家 ê 後生, 欲去 Tokyo 準備入學考試, 所以看我戴學生帽仔對我有好感. 阮講了幾句仔話, 伊問我講:

--

7.3

"Thank you. We're counting on you."

"Thank you. We really should see her all the way to Mito, but we can't." The miners expressed their gratitude.

The launch rocked violently. The dancing girl kept her mouth shut tight, staring at the same spot. When I grabbed the rope ladder and looked back, she tried to say good-bye but gave up and merely nodded one last time. The launch headed back to the wharf. Again and again Eikichiwaved the hunting cap I had just given him. As the launch receded in the distance, the dancing girl began to wave something white.

The steamship left Shimoda. I leaned against the railing and gazed at Oshima in the offing until the southern tip of the Izu Peninsula vanished behind me. It already seemed long ago that I parted from the dancing girl. When I glanced into the cabin to check on the old woman, I saw agroup of people gathered around her in a circle, consoling her. I felt relieved. I entered the cabin next door. The waves were choppy on Sagami Bay. I was tossed left and right as I sat. A crewman passed out small metal bowls. I lay down, using my bag as a pillow. My head felt empty, and I had no sense of time. My tears spilled onto my bag. My cheeks were so cold I turned my bag over. There was a boy lying next to me. He was the son of a factory owner in Kawazu and was on his way to Tokyo to prepare to enter school. The sight of me in my First Upper School cap seemed to elicit his goodwill. After we talked for a while, he asked,

7.2 伊攏恬恬

7.2 I lóng tiām-tiām [Tâi-gí gí-im]

Tī Eikichi khì thè góa bé Tokyo ê chûn-phiò hām pok-á chûn-phiò ê sî, góa chhōe chin chē ōe kap i kóng, m̄-koh i lóng tiām-tiām, kan-ta it-tit khòaⁿ pâi-chúi-kóng ê chúi ji̍p-hái ê só͘-chāi. Kúi-nā kái, góa ê ōe iáu-bōe kóng-liáu, i tō it-ti̍t tìm-thâu.

Chit sî, chi̍t-ê ná kiàn-tio̍k kang-lâng ê lâng kiâⁿ hiòng góa chia lâi, kóng: "A-pô, chit-ê lâng bē-bái lah."

"Siàu-liân--ê, lí sī boeh khì Tokyo hoⁿh? Goán sìn-jīm lí, pài-thok lí chhōa chit-ê a-pô khì Tokyo, hó bô? A-pô chin khó-liân. In kiáⁿ pún-chiâⁿ tī Rendaiji (蓮台寺) ê gîn-khòng chò-kang, in-ūi chit-kái ê liû-hêng kám-mō͘, hām in sin-pū lóng sí khì, kan-ta chhun saⁿ-ê sè-hàn gín-á. Bô hoat-tō͘, goán chham-siông liáu, chí-hó sàng in tńg-khì kò͘-hiong. In kò͘-hiong tī Ibaraki (茨城) ê Mito (水戶). M̄-koh a-pô siáⁿ mā m̄-bat, só͘-í, chûn kàu Reiganjima (靈岸島) ê sî, lí chhōa i khì chē óng Ueno (上野) ê tiān-chhia tō ē-sái lah. Án-ne hó bô? Mâ-hoân lí lah. Góa kā lí kiâⁿ-lé lah. Pài-thok lah. Ai ah, khòaⁿ tio̍h chit-khoán tāi-chì, lí mā ē kám-kak chiok khó-liân ê."

A-pô gāng-gāng khiā tī hia, āiⁿ chi̍t-ê iáu teh chia̍h-leng ê eⁿ-á, siang-chhiú kok khan chi̍t-ê cha-bó͘ gín-á, sè--ê tāi-khài saⁿ hòe, tōa--ê chha-put-to mā gō͘ hòe niâ. Tī i he o͘-sô-sô ê pau-ho̍k-á ni̍h ē-tàng khòaⁿ tio̍h tōa-lia̍p pn̄g-oân kap mûi-á koaⁿ. Ū gō͘-la̍k ê khòng-kang teh chio-ho͘ a-pô. Góa chin sóng-khoài tō tah-èng in kóng boeh chiàu-kò͘ a-pô.

--

7.2 伊攏恬恬 [台語語音]

Tī Eikichi 去替我買 Tokyo ê 船票和駁仔船票 ê 時, 我揣真濟話 kap 伊講, 毋過伊攏恬恬, 干焦一直看排水管 ê 水入海 ê 所在. 幾若改, 我 ê 話猶未講了, 伊 tō 一直 tìm 頭.

這時, 一个 ná 建築工人 ê 人行向我遮來, 講: "阿婆, 這个人袂䆀 lah."

"少年 ê, 你是欲去 Tokyo hoⁿh? 阮信任你, 拜託你 chhōa 這个阿婆去 Tokyo, 好無? 阿婆真可憐. In 囝本成 tī Rendaiji (蓮台寺) ê 銀礦做工, 因為這改 ê 流行感冒, 和 in 新婦攏死去, 干焦賰三个細漢囡仔. 無法度, 阮參詳了, 只好送 in 轉去故鄉. In 故鄉 tī Ibaraki (茨城) ê Mito (水戶). 毋過阿婆啥 mā 毋捌, 所以, 船到 Reiganjima (靈岸島) ê 時, 你 chhōa 伊去坐往 Ueno (上野) ê 電車 tō ē-sái lah. Án-ne 好無? 麻煩你 lah. 我 kā 你行禮 lah. 拜託 lah. Ai ah, 看著這款代誌, 你 mā 會感覺足可憐 ê."

阿婆 gāng-gāng 徛 tī 遐, āiⁿ 一个猶 teh 食奶 ê 嬰仔, 雙手各牽一个查某囡仔, 細 ê 大概三歲, 大 ê 差不多 mā 五歲 niâ. Tī 伊彼烏 sô-sô ê 包袱仔 ni̍h 會當看著大粒飯丸 kap 梅仔乾. 有五六个礦工 teh 招呼阿婆. 我真爽快 tō 答應 in 講欲照顧阿婆.

--

7.2

Eikichi went to buy my ticket for the boat to Tokyo and our passes for the launch. While he was gone, I tried to make small talk, but the dancing girl said nothing. She just stared down at the water pouring from a drainpipe into the sea. She just kept nodding over and over before I even finished speaking.

"Granny, this fellow looks nice." A man approached who looked like a laborer.

"You're a student, aren't you? Going back to Tokyo? I think I can trust you. Would you accompany this old lady to Tokyo? She's had some hard times. Her son was working at the silver mine at Rendaiji. But he and his wife both died in the flu epidemic. They left three children behind. We couldn't think of anything else to do, so we talked it over, and we're sending them back to their old hometown. That's Mito in Ibaraki Prefecture. But this old woman doesn't understand anything, so when the boat gets to Reiganjima in Tokyo, would you put her on a train to Ueno? I know it's a lot of trouble, but we're begging you. Just look at her. Don't you think it's pitiful?"

The old woman stood there with a blank expression, an infant strapped to her back. Two girls, about three and five, held her hands. I could see big rice balls and pickled plums in her dirty bundle. Five or six miners were looking after the old woman. I was pleased to accept the task.

7.1 Eikichi 替我買四包薰

Tē 7 Chiong

7.1 Eikichi thè góa bé sì-pau hun [Tâi-gí gí-im]

Chhut-hoat hit kang chá-khí chhit-tiám, góa tú teh chia̍h chá-tǹg, Eikichi ùi ke-á lō͘ kiò góa. I chhēng chi̍t-niá o͘-sek montsuki haori (紋付羽織) gōa-thò [ìn ū lūi-sū kamon (家紋) tô͘-àn ê gōa-saⁿ], ká-ná sī in-ūi boeh sàng góa te̍k-pia̍t chhēng ê lé-ho̍k. Bô khòaⁿ tio̍h cha-bó͘ ê sin-iáⁿ. Góa sûi kám-kak chiâⁿ hi-bî. Eikichi peh khí-lâi pâng-keng, kóng:

"Pún-lâi in lóng siūⁿ-boeh lâi sàng lí, m̄-koh cha-àm siuⁿ àm khùn, chá-khí peh bē khí-lâi, kiò góa lâi hōe sit-lé. In kóng, kôaⁿ--lâng ê sî ē tán--lí, it-tēng ài lâi oh."

Ke-chhī chhiu-thiⁿ thàu-chá ê hong chin chheⁿ-léng. Eikichi tī lō͘ ni̍h thè góa bé sì pau Shikishima (敷島) [phín-pâi] ê hun, chi̍t-kóa khī-á, hām Kaoru (カオール) kháu-tiong chheng-liâng-che.

"In-ūi goán sió-moē kiò Kaoru (薰)," i ná chhiò ná án-ne kóng.

"Chûn-téng chia̍h kam-á m̄-hó, khī-á tùi hîn-chûn ū hó-chhù, ē-sái chia̍h."

"Che, sàng hō͘ lí."

Góa kā phah-chiáu bō-á chhái lo̍h-lâi, kā tì tī Eikichi ê thâu-khak, chiah koh ùi kha-báng the̍h-chhut góa ê ha̍k-seng bō-á, ná kā jiâu-hûn áu-pêⁿ. Goán nn̄g-lâng lóng chhiò--chhut-lâi.

Boeh kàu bé-thâu ê sî, bú-niû khû tī hái-piⁿ ê hêng-iáⁿ hut-jiân chông-ji̍p góa ê sim-lāi. Goán kiâⁿ-kàu i ê sin-piⁿ í-chêng, i lóng bô tín-tāng. I kan-ta tiām-tiām khin-khin tìm-thâu. I iáu-sī cha-àm ê hòa-chong, che kèng-ka phah-tāng góa ê kám-chêng. Âng-âng ê ba̍k-kak ká-ná sī teh siū-khì, koh hián-sī chhut i siàu-liân ê khì-chit.

Eikichi mn̄g i:

"Kî-thaⁿ ê lâng ē lâi bô?"

Bú-niû iô-thâu.

"Lóng iáu teh khùn sioh?"

Bú-niû tìm-thâu.

--

第 7 章

7.1 Eikichi 替我買四包薰 [台語語音]

出發彼工早起七點, 我拄 teh 食早頓, Eikichi ùi 街仔路叫我. 伊穿一領烏色 montsuki haori (紋付羽織) 外套 [印有類似家紋圖案 ê 外衫], ká-ná 是因為欲送我特別穿 ê 禮服. 無看著查某 ê 身影. 我隨感覺誠稀微. Eikichi peh 起來房間, 講:

"本來 in 攏想欲來送你, 毋過昨暗 siuⁿ 暗睏, 早起 peh 袂起來, 叫我來 hōe 失禮. In 講, 寒人 ê 時會等你, 一定愛來 oh."

街市秋天透早 ê 風真青冷. Eikichi tī 路 ni̍h 替我買四包 Shikishima (敷島) [品牌] ê 薰, 一寡柿仔, 和 Kaoru (カオール) 口中清涼劑.

"因為阮小妹叫 Kaoru (薰)," 伊 ná 笑 ná án-ne 講.

"船頂食柑仔毋好, 柿仔對眩船有好處, 會使食."

"這, 送予你."

我 kā 拍鳥帽仔採落來, kā 戴 tī Eikichi ê 頭殼, 才 koh ùi kha-báng 提出我 ê 學生帽仔, ná kā 皺痕拗平. 阮兩人攏笑出來.

欲到碼頭 ê 時, 舞娘跍 tī 海邊 ê 形影忽然傱入我 ê 心內. 阮行到伊 ê 身邊以前, 伊攏無振動. 伊干焦恬恬輕輕 tìm 頭. 伊猶是昨暗 ê 化妝, 這更加拍動我 ê 感情. 紅紅 ê 目角 ká-ná 是 teh 受氣, koh 顯示出伊少年 ê 氣質.

Eikichi 問伊:

"其他 ê 人會來無?"

舞娘搖頭.

"攏猶 teh 睏 sioh?"

舞娘 tìm 頭.

--

VII

7.1

While I was eating breakfast the next morning, Eikichi called to me from the street. He was wearing a crested black haari. Apparently, he had dressed formally to send me off. There was no sign of the women. I felt sad. Eikichi came up to my room.

"Everyone else wanted to come see you off, but they went to bed so late they couldn't get up. They won't be coming. They said they'll be waiting for you this winter, so please do come."

The morning autumn breeze blew chill in the town. Along the way Eikichi bought four packs of Shikishima cigarettes, some persimmons, anda mouthwash called "Kaoru" for me.

"Because my sister's name is Kaoru." He smiled faintly.

"Mandarin oranges aren't the best thing to eat on a boat, but persimmons are good for seasickness, so you can have these."

"Here. You take this."

I pulled off my hunting cap and placed it on Eikichi's head. Then I dug my school cap out of my bag, and we laughed as I smoothed the wrinkles.

As we approached the dock, I was struck by the sight of the dancing girl crouching near the water. She remained motionless until I reached her. Silently, she lowered her head. Her makeup, the same this morning as it was the previous night, made me feel even more sentimental. The rouge at the corners of her eyes bestowed a youthful strength, as though she might even be angry.

"Are the others coming?"

Eikichi asked.

She shook her head.

"Are they still asleep?"

She nodded.

6.3 伊面憂面結轉來

6.3 I bīn-iu bīn-kat tńg--lâi [Tâi-gí gí-im]

Kan-ta chhun Chiyoko kap Yuriko tī pâng-keng ni̍h ê sî, góa chio in tâng-chê khì khòaⁿ tiān-iáⁿ, Chiyoko, chhiú tēⁿ pak-tó͘, kóng:

"Góa lâng bô sóng-khoài, koh kiâⁿ hiah hn̄g, góa bô hoat-tō͘." I bīn-sek pe̍h-pe̍h, lâng hi-hi. Yuriko bīn bô piáu-chêng, thâu-khak lê lo̍h.

Hit sî bú-niû teh hām kheh-chàn ê gín-á sńg. Khòaⁿ tio̍h góa, i tō khì kiû lāu-bú chún i khì khòaⁿ tiān-iáⁿ, m̄-koh kiat-kó sī bīn-iu bīn-kat tńg lâi góa sin-piⁿ, thè góa pâi chhâ-kia̍h.

"Án-chóaⁿ, tō hō͘ i ka-tī chi̍t-ê tòe i khì lah, kám m̄-hó?" Eikichi chhap-chhùi kóng, m̄-koh lāu-bú lóng bô tah-èng. Sī án-chóaⁿ ka-tī chi̍t-ê bē-sái? Góa si̍t-chāi mā sa lóng bô. Góa kiâⁿ lī mn̂g-kháu ê sî, bú-niû teh phok káu-á-kiáⁿ ê thâu, piáu-chêng léng-tām. Góa soah m̄-káⁿ kap i kóng siáⁿ. I ká-ná liân gia̍h thâu khòaⁿ góa ê khùi-la̍t mā bô ah.

Góa ka-tī chi̍t-lâng khì khòaⁿ tiān-iáⁿ. Lú pò-im-oân tiám iû-teng tha̍k é-káu tiān-iáⁿ ê soat-bêng. Tiān-iáⁿ soah, góa sûi kiâⁿ chhut-lâi, tńg-khì lí-koán.

Chhiú āu-khiau khòe tī thang-tâi, góa kú-kú khòaⁿ hiòng àm-iā ê ke-lō͘. Ke-lō͘ àm-bong-bong, góa kám-kak ná ū kó͘-siaⁿ ùi hn̄g-hn̄g ê só͘-chāi it-ti̍t thoân--lâi. Bô-tāi-bô-chì, góa soah ba̍k-sái chha̍p-chha̍p tih.

--

6.3 伊面憂面結轉來 [台語語音]

干焦賰 Chiyoko kap Yuriko tī 房間 ni̍h ê 時, 我招 in 同齊去看電影, Chiyoko, 手捏腹肚, 講:

"我人無爽快, koh 行 hiah 遠, 我無法度." 伊面色白白, 人虛虛. Yuriko 面無表情, 頭殼犁落.

彼時舞娘 teh 和客棧 ê 囡仔耍. 看著我, 伊 tō 去求老母准伊去看電影, 毋過結果是面憂面結轉來我身邊, 替我排柴屐.

"按怎, tō 予伊家己一个綴伊去 lah, 敢毋好?" Eikichi 插喙講, 毋過老母攏無答應. 是按怎家己一个袂使? 我實在 mā sa 攏無. 我行離門口 ê 時, 舞娘 teh phok 狗仔囝 ê 頭, 表情冷淡. 我煞毋敢 kap 伊講啥. 伊 ká-ná 連攑頭看我 ê 氣力 mā 無 ah.

我家己一人去看電影. 女播音員點油燈讀 é-káu 電影 ê 說明. 電影煞, 我隨行出來, 轉去旅館.

手後 khiau khòe tī 窗台, 我久久看向暗夜 ê 街路. 街路暗摸摸, 我感覺 ná 有鼓聲 ùi 遠遠 ê 所在一直傳來. 無代無誌, 我煞目屎㴙㴙滴.

--

6.3

When only Chiyoko and Yuriko were in the room, I invited them to a movie. Chiyoko held her stomach saying:

"I don't feel well. I'm too weak to walk that far." She slumped down, her face pale. Yuriko stiffened and hung her head.

The dancing girl was playing with the innkeeper's children on the stairs. When she heard me, she clung to the woman, begging for permission to go to a movie with me. She returned crestfallen.She set out my clogs.

"What do you mean? There's no harm in letting him take her by himself," Eikichi interjected. But the woman would not assent. I thought itindeed strange that she would not let us go together. As I went out the door, the dancing girl was stroking the puppy's head. The atmospherewas so restrained that I could not speak a word. The dancing girl lacked the vitality even to lift her face and look at me.

I went to the movie alone. The woman narrator read the script of the silent movie by the light of a tiny lamp. I left as soon as it ended and returned to my inn.

Resting my elbows on the windowsill, I stared out into the night town for a long time. It was a dark town. I thought I might hear a faint drum sounding far away. Inexplicably my tears fell.