譯了 ê 話

E̍k-liáu ê ōe

Che sī Kawabata Yasunari (川端康成) chho͘-loân ê kò͘-sū, mā sī i ta̍h-ji̍p bûn-ha̍k-kài sêng-miâ ê chok-phín. Kî-si̍t góa tha̍k ê Kawabata ê chok-phín, tē-it pún sī Seh-kok (雪國), tē-jī pún sī Chhian-ú Ho̍h (千羽鶴), m̄-koh góa siōng ài chit-ê té-phiⁿ kò͘-sū, chhim-chhim siū tio̍h chit-chióng chho͘-loân ê chheⁿ-siap kap sng-lám-tiⁿ só͘ kám-tōng.

Ūi-tio̍h boeh thé-hōe Izu tē-hng ê kéng-tì, góa tī 2017 nî tō an-pâi khì hia chi̍t lé-pài ê lí-hêng, tòa tī Ito (伊東). Tī hia góa ū chē-chē pái sàn-pō͘ tī Sagami-nada (相模灘) ê hái-hōaⁿ, mā chia̍p-chia̍p chē tī lí-koán thang-á piⁿ, àⁿ hiòng Oshima (大島) ê hong-hiòng khòaⁿ tōa hái. Tong-jiân, Ito ê un-chôaⁿ chin chhut-miâ, lí-koán ê e̍k-keng tī chhù-téng, góa ē-tàng ná chìm un-chôaⁿ, koh ná khòaⁿ tī hái-bīn tú-tú phû-chhut ê goe̍h-niû. M̄-koh sî-tāi bô kāng ah, tī chia sui-jiân iáu ū un-chôaⁿ thang chìm, góa í-keng khòaⁿ bē tio̍h bú-niû ia̍h-sī cháu-chhiàng ê gē-jîn ah lah. Kawabata chho͘-loân ê chêng-hoâi, góa mā kan-ta ē-tàng tī sió-soat lāi-té khì hoâi-liām ah lah.

Chit phiⁿ sió-soat ū phah kòe 6 pái ê tiān-iáⁿ; siōng sin ê tiān-iáⁿ sī 1974 nî iû Yamaguchi Momoe (山口百惠) kap Miura Tomokazu (三浦友和) chú-ián ê, tī Youtube ū chú-tê-kek thang thiaⁿ kap khòaⁿ (liân-kiat tī chia); góa tī e̍k-bûn lāi-té kok sió-chat iōng ê tô͘-phìⁿ, chú-iàu sī lia̍h 1963 年 iû Yoshinaga Sayuri (吉永小百合) kap Takahashi Hideki (高橋英樹) chú-ián ê iáⁿ-phìⁿ ōe-bīn. (Iáⁿ-phìⁿ ê liân-kiat tī chia. Chia sī 1993 nî ê tiān-sī kio̍k.)

Goân-pún góa sī kā odoriko (踊子/ dancing girl) hoan-e̍k chò "bú-lú, m̄-koh in-ūi chit-ê sû ē hō͘-lâng gō͘-kái chò "tī bú-thiaⁿ pôe lâng-kheh thiàu-bú ê sió-chiá," aū-lâi, góa koat-tēng kā kái-chò "bú-niû," iā tō sī "thiàu-bú ê ko͘-niû."

2023 nî, góa koh ná siu-kái e̍k-bûn, ná kā liân-chài tī Facebook ê Tâi-e̍k Bûn-ha̍k kûn-cho͘. Chit-pái ê hoat-piáu tit-tio̍h chı̍t-ūi tho̍k-chiá Gabriel Wang (王正道) Ss chin chē kiàn-gī kap kau-liû, iû-kî sī i kō͘ choan-gia̍p ki-su̍t, ūi múi chi̍t-chat ê lāi-bûn chè-chok TTS* tóng-àn, hun-hióng tī YouTube, góa mā kā he link khǹg tī múi-chat ê piau-tê āu-bīn. Tī chia, te̍k-pia̍t piáu-sī tùi Gabriel Wang ê kám-siā. [* TTS = text to sound, bûn-jī piàn gí-im]

Nā boeh liân-lo̍k góa, chhiáⁿ siá email: manlajo@gmail.com

譯了 ê 話

這是 Kawabata Yasunari (川端康成) 初戀 ê 故事, mā 是伊踏入文學界成名 ê 作品. 其實我讀 ê Kawabata ê 作品, 第一本是雪國 (Seh-kok), 第二本是千羽鶴 (Chhian-ú Ho̍h), 毋過我上愛這个短篇故事, 深深受著這種初戀 ê 生澀 kap 酸 lám 甜所感動.

欲體會伊豆 (Izu) 地方 ê 景致, 我 tī 2017 年 tō 安排去遐一禮拜 ê 旅行, 蹛 tī 伊東 (Ito), Tī 遐我有濟濟擺散步 tī 相模灘 (Sagami-nada) ê 海岸, mā 捷捷坐 tī 旅館窗仔邊, àⁿ 向大島 (Oshima) ê 方向看大海. 當然, 伊東 ê 溫泉真出名, 旅館 ê 浴間 tī 厝頂, 我 ē-tàng ná 浸溫泉, koh ná 看 tī 海面拄拄浮出 ê 月娘. 毋過時代無仝 ah, tī 遮雖然猶有溫泉通浸, 我已經看袂著舞娘抑是走唱 ê 藝人 ah lah. 川端初戀 ê 情懷, 我 mā 干焦 ē-tàng tī 小說內底去懷念 ah lah.

這篇小說有拍過 6 擺 ê 電影, 上新 ê 電影是 1974 年由山口百惠 (Yamaguchi Momoe) kap 三浦友和 (Miura Tomokazu) 主演 ê, tī Youtube 有主題曲通聽 kap 看 (連結 tī 遮); 我 tī 譯文內底各小節用 ê 圖片, 主要是掠 1963 年由吉永小百合 (Yoshinaga Sayuri) kap 高橋英樹 (Takahashi Hideki) 主演 ê 影片畫面. (影片 ê 連結 tī 遮. 遮是 1993 年 ê 電視劇.)

原本我是 kā 踊子 (odoriko/ dancing girl) 翻譯做 “舞女,” m̄-koh 因為這个詞 mā ē 予人誤解做 “tī 舞廳陪人客跳舞 ê 小姐,” 後來, 我決定 kā 改做 “舞娘,” iā tō sī “跳舞 ê 姑娘.”

2023 年, 我 koh ná 修改譯文, ná kā 連載 tī Facebook ê 台譯文學群組. 這擺 ê 發表得著一位讀者 Gabriel Wang (王正道) Ss 真濟建議 kap 交流, 尤其是伊 kō͘ 專業技術, ūi 每一節 ê 內文製作 TTS* 檔案, 分享 tī YouTube, 我 mā kā he link 囥 tī 每節 ê 標題後面. Tī chia, 特別表示對 Gabriel Wang ê 感謝. [* TTS = text to sound, 文字變語音]

連絡我, 請寫 email: manlajo@gmail.com